Untitled Document
ໜ້າຫລັກ | ກ່ຽວກັບ ທພສວ | ຜັງເວັບ | ສຳນັກງານໃຫຍ່
ທະນາຄານພົງສະຫວັນມຸ້ງໝັ້ນໃຫ້ທ່ານຫຼາຍກວ່າ
Interest Rates
ໜ້າຫລັກ ກ່ຽວກັບ ທະນາຄານພົງສະຫວັນ


ໂຄງຮ່າງ ປະຫວັດຄວາມເປັນມາ



  • ຄວາມເປັນມາຂອງກຸ່ມພົງສະຫວັນ.

  • ກຸ່ມບໍລິສັດພົງສະຫວັນ ເປັນກຸ່ມບໍລິສັດເອກະຊົນ ທີ່ປະສົບຜົນສໍາເລັດ ໃນວຽກງານການດໍາເນີນທຸລະກິດໃນຫຼາກຫຼາຍຂະແໜງ. ໃນໄລຍະ 30 ກວ່າປີທີ່ຜ່ານມາ, ທ່ານ ອ໋ອດ ພົງສະຫວັນ, ປະທານກຸ່ມບໍລິສັດພົງສະຫວັນ ໄດ້ປະກອບກິດຈະການຄ້າຂາຍພາຍໃນປະເທດ ເປັນຕົ້ນແມ່ນ ໄດ້ປະກອບກິດຈະການປ້ຳນ້ຳມັນ, ບໍລິສັດ ສະຫວັນຮຸ່ງເຮືອງຂາອອກ-ຂາເຂົ້າ ຈຳກັດ ເພື່ອເກັບຊື້ເຄື່ອງປ່າຂອງດົງ ແລະ ໄມ້ແປຮູບ ເພື່ອສົ່ງອອກ ແລະ ມີການນຳເຂົ້າສິນຄ້າອຸປະໂພກ-ບໍລິໂພກ ເພື່ອສະໜອງໃຫ້ປະຊາຊົນພາຍໃນແຂວງສະຫວັນນະເຂດ.

    ໃນໄລຍະຕໍ່ມາຂອງຊຸມປີ 1980 ທ່ານໄດ້ເລີ່ມປະກອບກິດຈະການຂຸດຄົ້ນໄມ້, ສ້າງໂຮງເລື້ອຍຫຼາຍແຫ່ງ ແລະ ຜະລິດໄມ້ສຳເລັດຮູບ ຈຳນວນຫຼາຍສິບພັນແມັດກ້ອນຕໍ່ປີ, ມີມູນຄ່າຫຼາຍສິບລ້ານໂດລາສະຫະລັດ ເພື່ອສົ່ງອອກໄປຍັງປະເທດຕ່າງໆໃນຂົງເຂດອາຊີຕາເວັນຕົກສ່ຽງໃຕ້ ເຊັ່ນ ປະເທດໄທ, ໄຕ້ຫວັນ, ຮົງກົງ, ສິງກະໂປ, ຫວຽດນາມ, ກຳປູເຈຍ ແລະ ປະເທດອື່ນໆ.

    ມາຮອດປີ 1995, ທ່ານເປັນນັກທຸລະກິດຄົນທຳອິດທີ່ໄດ້ລິເລີ່ມສ້າງຕັ້ງບໍລິສັດ ພົງສະຫວັນສະໜອງອຸປະກອນໂທລະຄົມ ຢູ່ ກຳແພງນະຄອນວຽງຈັນ ເພື່ອເປັນຕົວແທນຈຳໜ່າຍວິທະຍຸສື່ສານຍີ່ຫໍ້ Icom, Panasonic, Phillips ແລະ Motorola ຢູ່ປະເທດລາວ.

    ຈາກນັ້ນ, ລະຫວ່າງປີ 1997-2001 ໄດ້ສ້າງຕັ້ງບໍລິສັດ ໄພບູນການຄ້າ ຂາອອກ-ຂາເຂົ້າ ຈຳກັດຜູ້ດຽວ, ບໍລິສັດ ທອງສະຫວັນຂາອອກ-ຂາເຂົ້າ ຈຳກັດຜູ້ດຽວ, ໂຮງແຮມພົງສະຫວັນ ແລະ ບໍລິສັດ ພົງສະຫວັນ ກໍ່ສ້າງຈຳກັດ ພາຍໃຕ້ຊື່ຂອງ ກຸ່ມບໍລິສັດ ພົງສະຫວັນ.



  • ການລິເລີ່ມຂໍສ້າງຕັ້ງ ແລະ ວັນທີ່ໄດ້ຮັບການອະນຸຍາດ.

  • ທະນາຄານພົງສະຫວັນ ຈຳກັດ ໄດ້ຮັບໃບອະນຸຍາດສ້າງຕັ້ງເລກທີ 04\ທຫລ, ສະບັບລົງວັນທີ 27 ກຸມພາ 2007 ດ້ວຍທຶນຈົດທະບຽນ ໃນເບື້ອງຕົ້ນ ຈໍານວນ 10,000,000 ໂດລາ ສະຫະລັດ ທັງມີເງິນຄໍ້າປະກັນອີກ 2,500,000 ໂດລາສະຫະລັດ ໃວ້ທີ່ທະນາຄານກາງ ແຫ່ງ ສປປ ລາວ ຕາມກົດລະບຽບກົດຫມາຍ ແລະ ນະໂຍບາຍຂອງທະນາຄານແຫ່ງ ສປປລາວ ໄດ້ວາງອອກ. ທະນາຄານ ພົງສະຫວັນ ຈຳກັດ ເປັນທະນາຄານເອກະຊົນແຫ່ງທຳອິດ ຂອງ ສປປ ລາວ ທີ່ລົງທຶນ 100% ໄດ້ເປີດໃຫ້ບໍລິການມວນຊົນຢ່າງເປັນທງການໃນວັນທີ 29 ມີນາ 2007.
    ໃນປີ 2008 ໄດ້ມີການປະກອບທຶນຈົດທະບຽນເພີ່ມຕື່ມໃຫ້ເປັນ 19,999,999 ໂດລາສະຫະລັດ.



  • ສະຖານທີ່ຕັ້ງຂອງສຳນັກງານໃຫຍ່.

  • ໃນເມື່ອກ່ອນ, ສຳນັກງານໃຫຍ່ຕັ້ງຢູ່ ໜ່ວຍ 09, ຖະໜົນສາມແສນໄທ, ບ້ານ ອານຸ, ເມືອງ ຈັນທະບູລີ, ນະຄອນຫຼວງວຽງຈັນ.
    ປັດຈຸບັນ, ສຳນັກງານໃຫຍ່ຕັ້ງຢູ່ ໜ່ວຍ 01, ຖະໜົນໄກສອນ ພົມວິຫານ, ບ້ານ ພະຂາວ, ເມືອງ ໄຊທານີ, ນະຄອນຫຼວງວຽງຈັນ.



  • ແຮງຈູງໃຈໃນການຂະຫຍາຍທຸລະກິດສູ່ທະນາຄານ.

  • ນອກເໜືອຈາກຄວາມຝັນແລ້ວ ທ່ານປະທານຜູ້ຖືຮຸ້ນໃຫຍ່ ຍັງມີແຮງຈູງໃຈໃນການກໍ່ຕັ້ງທະນາຄານ 2 ຢ່າງຄື:

    ຂໍ້ທີ່ 1. ເນື່ອງຈາກນະໂຍບາຍຂອງພັກ ແລະ ລັດຖະບານຕ້ອງການນຳພາ ສປປ ລາວ ໄປສູ່ການເປັນປະເທດອຸດສາຫະກຳ ແລະ ເຕັກໂນໂລຢີ ໂດຍການເປີດກວ້າງໃຫ້ນັກລົງທຶນຈາກຕ່າງ ປະເທດເຂົ້າມາລົງທຶນໃນລາວ ເຊິ່ງສະຖາບັນການເງິນມີສ່ວນສຳຄັນ ໃນການສະໜັບສະໜູນ ແນວຄິດດັ່ງກ່າວໃຫ້ປະສົບຜົນສຳເລັດ.

    ຂໍ້ທີ່ 2. ທ່ານມີໂອກາດເດີນທາງໄປເຮັດທຸລະກິດຕິດຕໍ່ກັບຕ່າງປະເທດເລື້ອຍໆ ແລະ ສັງເກດເຫັນຄວາມທັນສະໄໝຂອງສະຖາບັນການເງິນໃນຫຼາຍປະເທດ ຈຶ່ງຕ້ອງການພັດທະນາສະຖາບັນການເງິນຂອງ ສປປ ລາວ ໃຫ້ມີຄວາມກ້າວໜ້າຄືກັນກັບທະນາຄານອື່ນໆ ເຊັ່ນ ມີຜະລິດຕະພັນທາງການເງິນທີ່ຫຼາກຫຼາຍ.



  • ເປົ້າໝາຍ ແລະ ຈຸດປະສົງຂອງການສ້າງຕັ້ງທະນາຄານ.

  • ວັດຖຸປະສົງຕົ້ນຕໍໃນການສ້າງຕັ້ງ ທະນາຄານ ພົງສະຫວັນ ຈໍາກັດ ແມ່ນເພື່ອປະກອບສ່ວນທາງດ້ານທຶນຮອນ ເຂົ້າໃນການພັດທະນາເສດຖະກິດ-ສັງຄົມ ຕາມແນວທາງນະໂຍບາຍຂອງ ພັກ-ລັດຖະບານວາງອອກ ແລະ ສ້າງໃຫ້ມີລະບົບການບໍລິການດ້ານການເງິນ - ການທະນາຄານ ທີ່ມີຄວາມຫຼາກຫຼາຍໃນດ້ານການບໍລິການ ເຮັດໃຫ້ຄົນລາວໄດ້ຮັບຜົນປະໂຫຍດສູງສຸດຈາກ ການບໍລິການດັ່ງກ່າວ.



  • ວິໄສທັດ ແລະ ພາລະກິດ.

  •  
  • ວິໄສທັດ.
  • “ທະນາຄານທາງເລືອກອັນດັບໜຶ່ງໃນ ສປປ ລາວ ແລະ ກ້າວສູ່ສາກົນ ພາຍໃນປີ 2015”
  • ພາລະກິດ.
     
  • ດຳເນີນລະບົບການຄຸ້ມຄອງບໍລິຫານ ຕາມມາດຕະຖານສາກົນ ບົນພື້ນຖານປະຕິບັດຕາມລະບຽບກົດໝາຍຂອງ ສປປ ລາວ ຢ່າງເຂັ້ມງວດ.
  • ສ້າງຊ່ອງທາງໃນການໃຫ້ບໍລິການດ້ານການເງິນ-ການທະນາຄານ ໂດຍການຂະຫຍາຍເຄື່ອຄ່າຍທີ່ກວ້າງຂວາງໃນຂອບເຂດທົ່ວປະເທດ ແລະ ໂດຍພາຍໃນປີ 2015 ຈະຕ້ອງຂະຫຍາຍເຄື່ອຄ່າຍສາຂາໃຫ້ໄດ້ 17 ແຫ່ງ ແລະ ນ໋ວຍບໍລິການໃຫ້ໄດ້ 50 ແຫ່ງ ພ້ອມດ້ວຍໜ່ວຍບໍລິການ ຫຼື ສຳນັກງານຕົວແທນຂອງຕົນຢູ່ຕ່າງປະເທດຈຳນວນໜຶ່ງ.
  • ໃຫ້ການບໍລິການກ້ານການທະນາຄານ ໂດຍການນຳໃຊ້ເຕັກໂນໂລຢີຊັ້ນສູງ ທີ່ທັນສະໃໝ ແລະ ມີລະດັບມາດຕະຖານສາກົນ ໃຫ້ແກ່ບັນດາບຸກຄົນ, ນິຕິບຸກຄົນ, ອົງການຈັດຕັ້ງສາກົນ, ອົງການຈັດຕັ້ງສັງຄົມ ແລະ ໜ່ວຍງານຂອງລັດໃນຂອບເຂດທົ່ວປະເທດ ແລະ ຕ່າງປະເທດ ເຊິ່ງມີເປົ້າໝາຍເພື່ອເປັນທະນາຄານພາຍໃນທີ່ດີທີ່ສຸດໃນ ສປປ ລາວ.


  • 1) ປະເພດການໃຫ້ບໍລິການ


     
  • ບໍລິການສິນເຊື່ອໃນຮູບແບບຕ່າງໆ ເຊັ່ນ: ເງິນກູ້ສົ່ງເສີມເສດຖະກິດ ຂະໜາດໃຫຍ່, ກາງ,ນ້ອຍ ແລະ ເງິນກູ້ສ່ວນບຸກຄົນ
  • ບໍລິການບັດເອທີເອັມ, ບັດເຄຼດິດວີຊາ ແລະ ມັດສະເຕີ
  • ບໍລິການເງິນຝາກທີ່ມີຫຼາຍຮູບຫຼາຍສີ ເຊັ່ນ: ຝາກສ່ວນບຸກຄົນ, ເງິນຝາກກະແສລາຍວັນ, ຝາກປະຢັດ, ຝາກປະຈໍາທັງໄລຍະສັ້ນ ແລະ ໄລຍະຍາວ ແລະ ອື່ນໆ
  • ບໍລິການທຸລະກິດຕ່າງປະເທດ ເຊັ່ນ: ການອອກໜັງສືຄ້ໍາປະກັນ ແລະ ໜັງສືສິນເຊື່ອເປັນຕົ້ນ ບໍລິການໂອນເງິນຜ່ານລະບົບເອເລັກໂຕຣນິກ ທັງພາຍໃນ ແລະ ຕ່າງປະເທດ, ບໍລິການໂອນ ເງິນດ່ວນຜ່ານລະບົບເຄືອຂ່າຍ ຂອງ Western Union
  • ບໍລິການແລກປ່ຽນເງິນຕາຕ່າງປະເທດ
  • ບໍລິການ ຖອນ ເງິນຜ່ານຕູ້ ATM.


  • 2) ບາງເຫດການພົ້ນເດັ່ນຂອງສະພາບການພັດທະນາ


     

    ໃນວັນທີ 04 ມີນາ 2008 ທະນາຄານພົງສະຫວັນໄດ້ຮ່ວມລົງນາມເຊັນສັນຍາການຮ່ວມມືວ່າດ້ວຍການຊະລະເງິນຂ້າມພົມແດນກັບທະນາຄານພັດທະນາຊົນນະບົດ ສ.ສ. ຫວຽດນາມ ຖືວ່າເປັນການລົງນາມຄັ້ງປະຫວັດສາດຂອງ 2 ປະເທດອ້າຍນ້ອງ ລາວ-ຫວຽດນາມ ໂດຍການລົງນາມຄັ້ງນີ້ກໍ່ເພື່ອເລັ່ງໃຫ້ການດຳເນີນທຸລະກຳດ້ານການຄ້າລະຫວ່າງຫົວໜ່ວຍທຸລະກິດ ແລະ ພໍ່ຄ້າຂາວຂາຍຢູ່ບໍລິເວນເຂດລາວບາວ ແລະ ດ່ານການຄ້າສາກົນແດນສະຫວັນມີຄວາມວ່ອງໄວ ທັງເປັນການປັບປຸງ ແລະ ອຳນວຍຄວາມສະດວກໃຫ້ແກ່ການຮ່ວມມືໃນຂົງເຂດການທະນາຄານສາກົນ ແລະ ຈະເປັນການເພີ່ມທະວີແກ່ການພັດທະນາສອງປະເທດທັງເປັນການເປີດການໃຫ້ບໍລິການແລກປ່ຽນເງິນຕາລະຫວ່າງສະກຸນເງິນກີບ ແລະ ສະກຸນເງິນດົງຜ່ານສອງທະນາຄານ.
    ໃນເດືອນກໍລະກົດ 2010, ຖືເປັນປະກົດການໃໝ່ຂອງອາຊຽນ ເມື່ອທະນາຄານພົງສະຫວັນ ຈຳກັດ ສາມາດຮ່ວມມືກັບທະນາຄານອຸດສາຫະກຳ ແລະ ການຄ້າແຫ່ງຊາດ ສປປ ຈີນ ໃນການຍົກລະດັບ ແລະ ປ່ຽນແປງການເຮັດທຸລະກຳການເງິນທີ່ສະດວກວ່ອງໄວຍິ່ງຂຶ້ນ ແລະ ທັງເຮັດໃຫ້ໄດ້ຮັບຜົນປະໂຫຍດຮ່ວມກັນລະຫວ່າງນັກທຸລະກິດຜູ້ຊົມໃຊ້ ແລະ ທະນາຄານຜູ້ໃຫ້ບໍລິການ.
    ທະນາຄານພົງສະຫວັນ ຈໍາກັດ ໄດ້ຮັບເປັນກຽດເຂົ້າເປັນສະມາຊິກຢ່າງເປັນທາງການ ຈາກ 2 ອົງການບັດທີ່ມີຊື່ສຽງໃນໂລກ (ຈາກສະມາຄົມບັດວີຊ້າ ໃນວັນທີ 03 ເດືອນຕຸລາ ປີ 2007 ແລະ ຈາກອົງການບັດມາສເຕີ້ຄາດ ໃນວັນທີ 03 ເດືອນ ສິງຫາ ປີ 2009). ພວກເຮົາປະສົບຄວາມສໍາເລັດໃນການດໍາເນີນການບໍລິການ ເພື່ອຮັບບັດວີຊ້າ ແລະ ມາສເຕີ້ຄາດ (Acquiring) ໃນທ້າຍ ເດືອນມັງກອນ ປີ 2010 ແລະ ພ້ອມທັງສືບຕໍ່ດໍາເນີນໂຄງການກ່ຽວກັບທຸລະກິດການອອກບັດ (Issuing) ແລະ ສາມາດເປີດໃຫ້ບໍລິການຢ່າງເປັນທາງການ ໃນວັນທີ 06 ເມສາ 2011 ເຊິ່ງເປັນສູນບັດສາກົນແຫ່ງທຳອິດໃນ ສປປ ລາວ.
    ໃນວັນທີ 24 ກຸມພາ 2012, ທະນາຄານພົງສະຫວັນ ຈຳກັດ ໄດ້ຈັດພິທີເຊັນສັນຍາ ແລະ ເປີດໂຕການໃຫ້ບໍລິການເຊື່ອມຕໍ່ລະບົບບັດເອທີເອັມກັບທະນາຄານກຸງເທບ ຈຳກັດ ມະຫາຊົນ (ປະເທດໄທ) ຢ່າງເປັນທາງການ ແລະ ສໍາເລັດຢ່າງຈົບງາມ ເຊິ່ງໄດ້ເອື້ອອໍານວຍຄວາມສະດວກໃຫ້ແກ່ການໄປກົດຖອນເງິນ ແລະ ກວດຍອດເງິນຢູ່ຕູ້ເອທີເອັມຂອງທະນາຄານກຸງເທບໄດ້.
    ໃນວັນທີ 16 ພະຈິກ 2012, ທະນາຄານພົງສະຫວັນ ຈຳກັດ ໄດ້ເຊັນສັນຍາກັບບໍລິສັດ JCB INTERNATIONAL(JCBI) ແຫ່ງປະເທດຍີ່ປຸ່ນ ທີ່ເປັນບໍລິສັດສູນກາງການຊຳລະສະສາງສາກົນພຽງແຫ່ງດ່ຽວໃນປະຈຸບັນນີ້ໃນປະເທດຍີ່ປຸ່ນ, ເພື່ອຮັບ ແລະ ອອກບັດພາຍໃຕ້ເຄື່ອງໝາຍການຄ້າຂອງ JCB ຢູ່ໃນ ສປປ ລາວ ເຊິ່ງແມ່ນທະນາຄານແຫ່ງທຳອິດໃນລາວທີ່ຈະອອກບັດພາຍໃຕ້ເຄື່ອງໝາຍການຄ້າຂອງ JCB.
    ໃນ​ວັນ​ທີ 19 ພະຈິກ 2012 ທະນາຄານ​ພົງ​ສະຫວັນ ຈຳກັດ ​ໄດ້​ຮັບ​ໃບ​ຢັ້ງຢືນ​ມາດຖານ​ລະບົບ​ການ​ຈັດການ​ດ້ານ​ຄຸນ​ນະພາ​ບ ISO 9001:2008 ຈາກບໍລິສັດ Transpacific Certifications Limited ​ເຊີ່ງ​ເປັນ​ໃບ​ຢັ້ງຢືນ​ສະ​ແດງ​ເຖິງ​ ການ​ບໍລິຫານ​ການ​ຄຸ້ມ​ຄອງ​ບໍລິຫານ​ທຸລະ​ກິດ​ ຕາມ​ມາ​ດຖານ​ສາກົນໃຫ້​ແກ່​ລູກ​ຄ້າ ​ເຊິ່ງ​ໄດ້​ເນັ້ນ​ເຖິງ​ການ​ປັບປຸງ​ຄຸນ​ນະພາ​ຍໃນທຸລະ​ກິດ, ມີ​ສ່ວນ​ດີ​ໃຫ້​ແກ່​ການ​ປັບປຸງ​ການ​ລົງທຶນປັບປຸງ​ສ່ວນ​ແບ່ງ​ຕະຫຼາດ​ໃຫ້​ດີ​ຂື້ນ ​ເຮັດ​ໃຫ້​ຍອດ​ຂາຍ​ສີນ​ຄ້າ​ເພີ່ມ​ຂຶ້ນ.